Logo

Azərbaycan Ordusu Xankəndinə girəcəkdi - Badalyan “Kazan düsturu”nun SİRRİNİ AÇDI


Ermənistanın xarici işlər nazirinin müavini Savarş Koçaryan dünən jurnalistlərə açıqlamasında “Kazan planı”nın Dağlıq Qarabağın danışıqlarda iştirakını nəzərdə tutduğunu açıqladı. Söhbət 2010-cu ildə həmin vaxt Rusiya prezident olan Dmitri Medvedevin təşəbbüsü ilə keçirilən Kazan görüşündən sonra gündəmə gələn “Kazan düsturu”ndan gedir. Rusiyanın təklif etdiyi bu plana görə, Qarabağ ətrafı rayonlar Azərbaycana qaytarılır, daha sonra Dağlıq Qarabağın müvəqqəti statusu həll olunur. Bölgəyə sülhməramlılar yerləşdirildikdən sonra Qarabağın yekun statusu müzakirəyə çıxarılır. S. Koçaryanın fikrincə, “Kazan düsturu” Qarabağın danışıqlar prosesində iştirakını təmin edir, hərçənd, bu təklifdə belə məqam yoxdur. Mümkündür ki, Sarkisyan dövründən qalan Koçaryan postunu qorumaq üçün yeni baş nazir Paşinyanın “Qarabağın danışıqlarda tərəf kimi iştirak etməsi” ideyasını davam etdirmək üçün belə fikri önə sürüb.

Erməni siyasi şərhçi Akop Badalyan Koçaryanın dediklərinin yanlış olduğunu yazıb.

Erməni şərhçi yazır: “Kazan planı”nın Ermənistan üçün təhlükəsi haqqında analitiklər, ekspertlər zaman-zaman danışıb. Həm hakimiyyət, həm də müxalifət bu planı pisləyib. Çünki “Kazan planı” Azərbaycanın müharibə hüququnu tanıyır. 2016-cı ildə “aprel müharibəsi”ndən sonra Serj Sarkisyan “Kazan planı”nın Ermənistan üçün təhlükəsini tanıdı. Sarkisyan ərazilərin Azərbaycana qaytarılması və Qarabağın müvəqqəti statusunu özündə ehtiva edən planla razılaşmışdı. Lakin İlham Əliyev sənədi imzalamaqdan imtina etdi. Həmin vaxt Bakının niyə imzadan imtina etməsi haqqında suallar yaranmışdı, lakin sonrakı proseslər göstərdi ki, Azərbaycan müharibə hüququndan istifadə etmək üçün sənədi imzalamayıb. Və “aprel müharibəsi”ndə onlar bu hüquqdan istifadə edərək, ərazilərin bir qismini qaytardı. Əgər “aprel müharibəsi”ndə Azərbaycan Ordusu Xankəndinə qədər irəliləsəydi, Minsk qrupunun həmsədr ölkələri ona heç bir etiraz edə bilməyəcəkdi. Lakin Rusiyanın vasitəçiliyi ilə müharibə dayandı. İndi Koçaryan “Kazan planı”nın hansı üstünlüklərindən danışır? Bu plan Azərbaycana müharibə hüququ verir və “aprel müharibəsi” ilə Bakı bu hüququnu daha da möhkəmləndirdi”.

Publika.az